GRAZAS!

Durante todo este primeiro trimestre tivemos a grande sorte de contar na aula con Paula, mestra de prácticas. Queremos agradecerlle o seu traballo, implicación, axuda e sobre todo o agarimo co que nos tratou durante todo este tempo.

Agardamos que che vaia fenomenal e xa sabes que en Barrionovo tes as portas abertas para cando queiras volver. 

Botarémoste moitísimo de menos. 

Querémoste Paula! 

CAMIÑO SENSORIAL

Encantounos esta actividade que nos preparou a profe Paula hai uns días. Un camiño sensorial no que os pequen@s foron experimentando distintas texturas e sensacións cos seus pés.

PLANTAMOS CASTAÑAS

Hai uns días, aproveitando algunhas castañas que nos sobraron da festa do magosto, o ratiño Paco propúxonos un novo experimento: probar a plantar unha destas castañas. Para facelo deixounos no baúl da aula unha castaña, unha botella de plástico cortada á metade, terra, unha pa, unha regadeira e un cachiño de papel de cociña. 

O primeiro que fixemos foi empregar a pa para encher a botella coa terra, a continuación introducimos a castaña coa parte lisa para abaixo (previamente a castaña cortámoslle a puntiña para favorecer a xerminación). Unha vez feito isto, colocamos un cachiño de papel cubrindo a castaña e finalmente botamos un pouquiño de auga. 

Agora temos que estar moi atent@s para observar se comeza a xermolar un castiñeiro.